Idey: Globasa-firma hu da maydo bandera
Unyum Globasa-firma ger maydo bandera.
Pesa sen bon estimula na krea xey. Eger ren cudu pesa yon na maydo Globasa-xey, dento ger yunkigi na produti max Globasa-xey ji na reklama oto in max loka cel na max maydo oto.
In nunli bazar fe pifuible Globasa-xey, bandera sen maxim day fe jaci. Hay plu Globasa-yen hu da le kari Globasa-bandera fe suli maner, yon plu kimapul netoli dukan.
Imi am hare Globasa-firma hu da maydo Globasa-bandera!
Mas hay day katinaxey: uje-sonzayne firma hu da maydo bandera maydo daymulti bandera, ji firma hare daykimapul maxina hu da produti bandera fe efetopul maner: un bandera of denpul daykimapul maxina sen minmo kimapul fe unya. Ren uje abil na kari Globasa-bandera of denpul firma: ren suprafuha imaje (Globasa-bandera) ji ren paya daju 50 euro.
Mi no jixi kama neo firma abil na produti bandera har bon kwalita por minmo day kima kom sonzayne firma. Ible, Globasa-firma ger yongu sonzayne firma, mas dento mena maxmo day kima cel finili kliente (fe kompara fe na jinji kari of sonzayne nen-Globasali firma). Pia, hay "ekonomi fe eskela": eger ren kari multi xey fe un mara, moyun xey sen minmo kimapul. Fe asif, imi no abil na lijun den fato fe nunya koski no hay kufi person hu da vole Globasa-bandera fe moy mesi.
Mas imi am no fikir sol tem pesa. Pia na produti Globasa-simbolo sahay Globasa-kampani. Max Globasa-simbolo in globa mena maxmo day kihoy ki bante xa xoroko Globasa-simbolo ji xa xorjui Globasa. Eger ren plasi Globasa-bandera in (or per) sesu baytu, dento ger kufiya cel na xorhare jui de familyen or doste.
Nundin, solo maner na konkure sonzayne bandera-firma sen na preferi Globasa-firma. Globasayen am preferi bandera of Globasa-firma hata eger oto ger max kima. Denmaner, bage of pesa idi cel person hu da sahay Globasa ji tosu komuntim.
No hay multi maner fe xunjan cel denpul Globasa-firma, minus na maxgi numer fe palayen: max Globasa-palayen mena max person hu da ger vole Globasa-bandera. Ible, Globasa-firma ger maydo pia alo xey, denpul kom kamisa, topi, fenjan... Ible Globasa-firma ger maydo pia xey cel alo sahaybasa (denpul kom Esperanto) koski Globasa-palayen pimpan beinteres alo sahaybasa.
Eger yu hare alo idey tem maxim bon unyum Globasa-firma, am konegi to in Discord!